॥ईश्वर उवाच ॥ दक्षिणे मंडलस्याथ वैयाघ्रं चर्मशोभनम्॥ आस्तीर्य्य शुद्धतोयेन प्रोक्षयेदस्त्रमंत्रतः ॥ १॥

॥Izvara uvAca ॥ dakSiNe maMDalasyAtha vaiyAghraM carmazobhanam॥ AstIryya zuddhatoyena prokSayedastramaMtrataH ॥ 1॥

प्रणवं पूर्वमुद्धृत्य पश्चादाधार मुद्धरेत् ॥ तत्पश्चाच्छक्तिकमलं चतुर्थ्यंतं नमोन्तकम् ॥ २॥

praNavaM pUrvamuddhRtya pazcAdAdhAra muddharet ॥ tatpazcAcchaktikamalaM caturthyaMtaM namontakam ॥ 2॥

मनुमेवं समुच्चार्य स्थित्वा तस्मिन्नुदङ्मुखः ॥ प्राणानायम्य विधिवत्प्र णवोच्चारपूर्वकम् ॥ ३॥

manumevaM samuccArya sthitvA tasminnudaGmukhaH ॥ prANAnAyamya vidhivatpra NavoccArapUrvakam ॥ 3॥

अग्निरित्यादिभिर्मंत्रैर्भस्म संधारयेत्ततः ॥ शिरसि श्रीगुरुं नत्वा मण्डलं रचयेत्पुनः ॥ ४॥

agnirityAdibhirmaMtrairbhasma saMdhArayettataH ॥ zirasi zrIguruM natvA maNDalaM racayetpunaH ॥ 4॥

त्रिकोणवृत्तं बाह्ये तु चतुरस्रात्मकं क्रमात् ॥ अभ्यर्च्योमिति साधारं स्थाप्य शंखं समर्चयेत् ॥ ५॥

trikoNavRttaM bAhye tu caturasrAtmakaM kramAt ॥ abhyarcyomiti sAdhAraM sthApya zaMkhaM samarcayet ॥ 5॥

आपूर्य शुद्धतोयेन प्रणवेन सुगंधिना॥ अभ्यर्च्य गंधपुष्पाद्यैः प्रणवेन च सप्तधा ॥ ६ ॥

ApUrya zuddhatoyena praNavena sugaMdhinA॥ abhyarcya gaMdhapuSpAdyaiH praNavena ca saptadhA ॥ 6 ॥

अभिमंत्र्य ततस्तस्मिन्धेनुमुद्रां प्रदर्शयेत ॥ शंखमुद्रां च तेनैव प्रोक्षयेदस्त्रमंत्रतः ॥ ७ ॥

abhimaMtrya tatastasmindhenumudrAM pradarzayeta ॥ zaMkhamudrAM ca tenaiva prokSayedastramaMtrataH ॥ 7 ॥

आत्मानं गंधपुष्पादिपूजोपकरणानि च ॥ प्राणायामत्रयं कृत्वा ऋष्यादिकमथाचरेत् ॥ ८ ॥

AtmAnaM gaMdhapuSpAdipUjopakaraNAni ca ॥ prANAyAmatrayaM kRtvA RSyAdikamathAcaret ॥ 8 ॥

अस्य श्रीसौरमंत्रस्य देवभाग ऋषिस्ततः ॥ छन्दो गायत्रमित्युक्तं देवस्सूर्यो महेश्वरः ॥ ९॥

asya zrIsauramaMtrasya devabhAga RSistataH ॥ chando gAyatramityuktaM devassUryo mahezvaraH ॥ 9॥

देवता स्यात्षडंगानि ह्रामित्यादीनि विन्यसेत् ॥ ततस्संप्रोक्षयेत्पद्ममस्त्रेणाग्नेरगोचरम् ॥ १०॥

devatA syAtSaDaMgAni hrAmityAdIni vinyaset ॥ tatassaMprokSayetpadmamastreNAgneragocaram ॥ 10॥

तस्मिन्समर्चयेद्विद्वान् प्रभूतां विमलामपि ॥ सारां चाथ समाराध्य पूर्वादिपरतः क्रमात् ॥ ११ ॥

tasminsamarcayedvidvAn prabhUtAM vimalAmapi ॥ sArAM cAtha samArAdhya pUrvAdiparataH kramAt ॥ 11 ॥

अथ कालाग्निरुद्रं च शक्तिमाधारसंज्ञिताम् ॥ अनन्तं पृथिवीं चैव रत्नद्वीपं तथैव च ॥ १२ ॥

atha kAlAgnirudraM ca zaktimAdhArasaMjJitAm ॥ anantaM pRthivIM caiva ratnadvIpaM tathaiva ca ॥ 12 ॥

संकल्पवृक्षोद्यानं च गृहं मणिमयं ततः॥ रक्तपीठं च संपूज्य पादेषु प्रागुपक्रमात् ॥ १३॥

saMkalpavRkSodyAnaM ca gRhaM maNimayaM tataH॥ raktapIThaM ca saMpUjya pAdeSu prAgupakramAt ॥ 13॥

धर्मं ज्ञानं च वैराग्यमैश्वर्यं च चतुष्टयम्॥ अधर्माद्यग्निकोणादिकोणेषु च समर्चयेत् ॥ १४ ॥

dharmaM jJAnaM ca vairAgyamaizvaryaM ca catuSTayam॥ adharmAdyagnikoNAdikoNeSu ca samarcayet ॥ 14 ॥

मायाधश्छदनं पश्चाद्विद्योर्ध्वच्छदनं ततः ॥ सत्त्वं रजस्तमश्चैव समभ्यर्च्य यथाक्रमम् ॥ १५॥

mAyAdhazchadanaM pazcAdvidyordhvacchadanaM tataH ॥ sattvaM rajastamazcaiva samabhyarcya yathAkramam ॥ 15॥

पूर्वादिदिक्षु मध्ये च दीप्तां सूक्ष्मां जयामपि ॥ भद्रां विभूति विमलाममोघां वैद्युतामपि॥ १६॥

pUrvAdidikSu madhye ca dIptAM sUkSmAM jayAmapi ॥ bhadrAM vibhUti vimalAmamoghAM vaidyutAmapi॥ 16॥

सर्वतोमुखसंज्ञां च कन्दनालं तथैव च ॥ सुषिरं च ततस्तं तु कंटकांस्तदनंतरम् ॥ १७ ॥

sarvatomukhasaMjJAM ca kandanAlaM tathaiva ca ॥ suSiraM ca tatastaM tu kaMTakAMstadanaMtaram ॥ 17 ॥

मूलच्छदनकिंजल्कप्रकाशसकलात्मनः ॥ पंचग्रंथिकर्णिकां च दलानि तदनंतरम् ॥ १८ ॥

mUlacchadanakiMjalkaprakAzasakalAtmanaH ॥ paMcagraMthikarNikAM ca dalAni tadanaMtaram ॥ 18 ॥

केशरान्ब्रह्मविष्णू च रुद्रमात्मानमेव च ॥ अन्तरात्मानमपि च ज्ञानात्मपरमात्मनि ॥ १९ ॥

kezarAnbrahmaviSNU ca rudramAtmAnameva ca ॥ antarAtmAnamapi ca jJAnAtmaparamAtmani ॥ 19 ॥

सम्पूज्य पश्चात्सौराख्यं योगपीठं समर्चयेत् ॥ पीठोपरि समाकल्प्य मूर्त्तिं मूलेन मूलवित् ॥ २०॥

sampUjya pazcAtsaurAkhyaM yogapIThaM samarcayet ॥ pIThopari samAkalpya mUrttiM mUlena mUlavit ॥ 20॥

निरुद्धप्राण आसीनो मूलेनैव स्वमूलतः ॥ शक्तिमुत्थाप्य तत्तेजः प्रभावात्पिंगलाध्वना ॥ २१ ॥

niruddhaprANa AsIno mUlenaiva svamUlataH ॥ zaktimutthApya tattejaH prabhAvAtpiMgalAdhvanA ॥ 21 ॥

पुष्पांजलौ निर्गमय्य मण्डलस्थस्य भास्वतः ॥ सिन्दूरारुणदेहस्य वामार्द्धदयितस्य च ॥ २२ ॥

puSpAMjalau nirgamayya maNDalasthasya bhAsvataH ॥ sindUrAruNadehasya vAmArddhadayitasya ca ॥ 22 ॥

अक्षस्रक्पाशखट्वांगकपालांकुशपंकजम् ॥ शंखं चक्रं दधानस्य चतुर्वक्त्रस्य लोचनैः ॥ २३ ॥

akSasrakpAzakhaTvAMgakapAlAMkuzapaMkajam ॥ zaMkhaM cakraM dadhAnasya caturvaktrasya locanaiH ॥ 23 ॥

राजितस्य द्वादशभिस्तस्य हृत्पंकजोदरे ॥ प्रणवं पूर्वमुद्धृत्य ह्रांह्रींसस्तदनन्तरम् ॥ २४॥

rAjitasya dvAdazabhistasya hRtpaMkajodare ॥ praNavaM pUrvamuddhRtya hrAMhrIMsastadanantaram ॥ 24॥

प्रकाशशक्तिसहितं मार्तण्डं च ततः परम् ॥ आवाहयामि नम इत्यावाह्या वाहनाख्यया ॥ २५॥

prakAzazaktisahitaM mArtaNDaM ca tataH param ॥ AvAhayAmi nama ityAvAhyA vAhanAkhyayA ॥ 25॥

मुद्रया स्थापनाद्याश्च मुद्रास्संदर्शयेत्ततः ॥ विन्यस्यांगानि ह्रां ह्रीं ह्रूमंतेन मनुना ततः ॥ २६॥

mudrayA sthApanAdyAzca mudrAssaMdarzayettataH ॥ vinyasyAMgAni hrAM hrIM hrUmaMtena manunA tataH ॥ 26॥

पंचोपचारान्संकल्प्य मूलेनाभ्यर्चयेत्त्रिधा ॥ केशरेषु च पद्मस्य षडंगानि महेश्वरि ॥ २७॥

paMcopacArAnsaMkalpya mUlenAbhyarcayettridhA ॥ kezareSu ca padmasya SaDaMgAni mahezvari ॥ 27॥

वह्नीशरक्षोवायूनां परितः क्रमतः सुधीः ॥ द्वितीयावरणे पूज्याश्चतस्रो मूर्तयः क्रमात् ॥ २८ ॥

vahnIzarakSovAyUnAM paritaH kramataH sudhIH ॥ dvitIyAvaraNe pUjyAzcatasro mUrtayaH kramAt ॥ 28 ॥

पूर्वाद्युत्तरपर्यंतं दलमूलेषु पार्वति ॥ आदित्यो भास्करो भानू रविश्चेत्यनुपूर्वशः ॥ २९ ॥

pUrvAdyuttaraparyaMtaM dalamUleSu pArvati ॥ Adityo bhAskaro bhAnU ravizcetyanupUrvazaH ॥ 29 ॥

अर्को ब्रह्मा तथा रुद्रो विष्णुश्चेति पुनः प्रिये ॥ ईशानादिषु संपूज्यास्तृतीयावरणे पुनः ॥ ३०॥

arko brahmA tathA rudro viSNuzceti punaH priye ॥ IzAnAdiSu saMpUjyAstRtIyAvaraNe punaH ॥ 30॥

सोमं कुजं बुधं जीवं कविं मंदं तम स्तमः ॥ समंततो यजेदेतान्पूर्वादिदलमध्यतः ॥ ३१॥

somaM kujaM budhaM jIvaM kaviM maMdaM tama stamaH ॥ samaMtato yajedetAnpUrvAdidalamadhyataH ॥ 31॥

अथवा द्वादशादित्यान्द्वितीयावरणे यजेत ॥ तृतीयावरणे चैव राशीर्द्वादश पूजयेत् ॥ ३२॥

athavA dvAdazAdityAndvitIyAvaraNe yajeta ॥ tRtIyAvaraNe caiva rAzIrdvAdaza pUjayet ॥ 32॥

सप्तसागरगंगाश्च बहिरस्य समंततः ॥ ऋषीन्देवांश्च गंधर्वान्पन्नगानप्सरोगणान् ॥ ३३॥

saptasAgaragaMgAzca bahirasya samaMtataH ॥ RSIndevAMzca gaMdharvAnpannagAnapsarogaNAn ॥ 33॥

ग्रामण्यश्च तथा यक्षान्यातुधानांस्तथा हयान् ॥ सप्तच्छन्दोमयांश्चैव वालखिल्यांश्च पूजयेत् ॥ ३४ ॥

grAmaNyazca tathA yakSAnyAtudhAnAMstathA hayAn ॥ saptacchandomayAMzcaiva vAlakhilyAMzca pUjayet ॥ 34 ॥

एवं त्र्यावरणं देवं समभ्यर्च्य दिवाकरम् ॥ विरच्य मंडलं पश्चाच्चतुरस्रं समाहितः ॥ ३५ ॥

evaM tryAvaraNaM devaM samabhyarcya divAkaram ॥ viracya maMDalaM pazcAccaturasraM samAhitaH ॥ 35 ॥

स्थाप्य साधारकं ताम्रपात्रं प्रस्थोदविस्तृतम् ॥ पूरयित्वा जलैः शुद्धैर्वासितैः कुसुमादिभिः ॥ ३६॥

sthApya sAdhArakaM tAmrapAtraM prasthodavistRtam ॥ pUrayitvA jalaiH zuddhairvAsitaiH kusumAdibhiH ॥ 36॥

अभ्यर्च्य गंधपुष्पाद्यैर्जानुभ्यामवनीं गतः ॥ अर्घ्यपात्रं समादाय भूमध्यान्तं समुद्धरेत् ॥ ३७॥

abhyarcya gaMdhapuSpAdyairjAnubhyAmavanIM gataH ॥ arghyapAtraM samAdAya bhUmadhyAntaM samuddharet ॥ 37॥

ततो ब्रूयादिमं मंत्रं सावित्रं सर्वसिद्धिदम् ॥ शृणु तच्च महादेवि भक्तिमुक्तिप्रदं सदा ॥ ३८॥

tato brUyAdimaM maMtraM sAvitraM sarvasiddhidam ॥ zRNu tacca mahAdevi bhaktimuktipradaM sadA ॥ 38॥

सिन्दूरवर्णाय सुमण्डलाय नमोऽस्तु वज्राभरणाय तुभ्यम् ॥ पद्माभनेत्राय सुपंकजाय ब्रह्मेन्द्रनारायणकारणाय ॥ ३९ ॥

sindUravarNAya sumaNDalAya namo'stu vajrAbharaNAya tubhyam ॥ padmAbhanetrAya supaMkajAya brahmendranArAyaNakAraNAya ॥ 39 ॥

सरक्तचूर्णं ससुवर्णतोयं स्रक्कुंकुमाढ्यं सकुशं सपुष्पम् ॥ प्रदत्तमादाय सहेमपात्रं प्रशस्तमर्घ्यं भगवन्प्रसीद ॥ ४० ॥

saraktacUrNaM sasuvarNatoyaM srakkuMkumADhyaM sakuzaM sapuSpam ॥ pradattamAdAya sahemapAtraM prazastamarghyaM bhagavanprasIda ॥ 40 ॥

एवमुक्त्वा ततो दत्त्वा तदर्थं सूर्यमूर्त्तये ॥ नमस्कुर्यादिमं मंत्रं पठित्वा सुसमाहितः ॥ ४१॥

evamuktvA tato dattvA tadarthaM sUryamUrttaye ॥ namaskuryAdimaM maMtraM paThitvA susamAhitaH ॥ 41॥

नमश्शिवाय साम्बाय सगणायादिहेतवे ॥ रुद्राय विष्णवे तुभ्यं ब्रह्मणे च त्रिमूर्तये ॥ ४२ ॥

namazzivAya sAmbAya sagaNAyAdihetave ॥ rudrAya viSNave tubhyaM brahmaNe ca trimUrtaye ॥ 42 ॥

एवमुक्त्वा नमस्कृत्य स्वासने समवस्थितः ॥ ऋष्यादिकं पुनः कृत्वा करं संशोध्य वारिणा ॥ ४३ ॥

evamuktvA namaskRtya svAsane samavasthitaH ॥ RSyAdikaM punaH kRtvA karaM saMzodhya vAriNA ॥ 43 ॥

पुनश्च भस्म संधार्य पूर्वोक्तेनैव वर्त्मना ॥ न्यासजातम्प्रकुर्वीत शिवभावविवृद्ध्धये ॥ ४४ ॥

punazca bhasma saMdhArya pUrvoktenaiva vartmanA ॥ nyAsajAtamprakurvIta zivabhAvavivRddhdhaye ॥ 44 ॥

पंचोपचारैस्संपूज्य शिरसा श्रीगुरुम्बुधः ॥ प्रणवं श्रीचतुर्थ्यंतं नमोंतं प्रणमेत्ततः ॥ ४५ ॥

paMcopacAraissaMpUjya zirasA zrIgurumbudhaH ॥ praNavaM zrIcaturthyaMtaM namoMtaM praNamettataH ॥ 45 ॥

पंचात्मकं बिन्दुयुतं पंचमस्वरसंयुतम् ॥ तदेव बिन्दुसहितं पंचमस्वरवर्जितम् ॥ ४६ ॥

paMcAtmakaM binduyutaM paMcamasvarasaMyutam ॥ tadeva bindusahitaM paMcamasvaravarjitam ॥ 46 ॥

पंचमस्वरसंयुक्तं मंत्रीशं च सबिन्दुकम् ॥ उद्धृत्य बिन्दुसहितं संवर्तकमथोद्धरेत् ॥ ४७॥

paMcamasvarasaMyuktaM maMtrIzaM ca sabindukam ॥ uddhRtya bindusahitaM saMvartakamathoddharet ॥ 47॥

एतैरेव क्रमाद्बीजैरुद्धृतैः प्रणमेद्बुधः ॥ भुजयोरूरुयुग्मे च गुरुं गणपतिन्तथा॥ ४८॥

etaireva kramAdbIjairuddhRtaiH praNamedbudhaH ॥ bhujayorUruyugme ca guruM gaNapatintathA॥ 48॥

दुर्गां च क्षेत्रपालं च बद्धांजलिपुटः स्थितः ॥ ओमस्त्राय फडित्युक्त्वा करौ संशोध्य षट् क्रमात् ॥ ४९ ॥

durgAM ca kSetrapAlaM ca baddhAMjalipuTaH sthitaH ॥ omastrAya phaDityuktvA karau saMzodhya SaT kramAt ॥ 49 ॥

अपसर्प्पन्त्विति प्रोच्य प्रणवं तदनंतरम् ॥ अस्त्राय फडिति प्रोच्य पार्ष्णिघातत्रयेण तु ॥ ५०॥

apasarppantviti procya praNavaM tadanaMtaram ॥ astrAya phaDiti procya pArSNighAtatrayeNa tu ॥ 50॥

उद्धृत्य विघ्नान्भूयिष्ठान्कर तालत्रयेण तु ॥ अन्तरिक्षगता न्दृष्ट्वा विलोक्य दिवि संस्थितान् ॥ ५१ ॥

uddhRtya vighnAnbhUyiSThAnkara tAlatrayeNa tu ॥ antarikSagatA ndRSTvA vilokya divi saMsthitAn ॥ 51 ॥

निरुद्धप्राण आसीनो हंसमंत्रमनुस्मरन् ॥ हृदिस्थं जीवचैतन्यं ब्रह्मनाड्या समान येत् ॥ ५२ ॥

niruddhaprANa AsIno haMsamaMtramanusmaran ॥ hRdisthaM jIvacaitanyaM brahmanADyA samAna yet ॥ 52 ॥

द्वादशांतस्स्थविशदे सहस्रारमहाम्बुजे ॥ चिच्चन्द्रमण्डलान्तस्थं चिद्रूपं परमेश्वरम् ॥ ५३ ॥

dvAdazAMtassthavizade sahasrAramahAmbuje ॥ ciccandramaNDalAntasthaM cidrUpaM paramezvaram ॥ 53 ॥

शोषदाहप्लवान्कुर्याद्रेचकादि क्रमेण तु ॥ सषोडशचतुष्षष्टिद्वात्रिंशद्गणनायुतैः ॥ ५४ ॥

zoSadAhaplavAnkuryAdrecakAdi krameNa tu ॥ saSoDazacatuSSaSTidvAtriMzadgaNanAyutaiH ॥ 54 ॥

वाय्वग्निसलिलाद्यैस्तैस्स्तवेदाद्यैरनुक्रमात् ॥ प्राणानायम्य मूलस्थां कुण्डलीं ब्रह्मरंध्रगाम् ॥ ५५ ॥

vAyvagnisalilAdyaistaisstavedAdyairanukramAt ॥ prANAnAyamya mUlasthAM kuNDalIM brahmaraMdhragAm ॥ 55 ॥

आनीय द्वादशांतस्थसहस्राराम्बुजोदरे ॥ चिच्चन्द्रमण्डलोद्भूतपरमामृतधारया ॥ ५६ ॥

AnIya dvAdazAMtasthasahasrArAmbujodare ॥ ciccandramaNDalodbhUtaparamAmRtadhArayA ॥ 56 ॥

संसिक्तायां तनौ भूयश्शुद्धदेहस्सुभावनः ॥ सोहमित्यवतीर्याथ स्वात्मानं हृदयाम्बुजे ॥ ५७ ॥

saMsiktAyAM tanau bhUyazzuddhadehassubhAvanaH ॥ sohamityavatIryAtha svAtmAnaM hRdayAmbuje ॥ 57 ॥

आत्मन्यावेश्य चात्मानममृतं सृतिधारया ॥ प्राणप्रतिष्ठां विधिवत्कुर्यादत्र समाहितः ॥ ५८ ॥

AtmanyAvezya cAtmAnamamRtaM sRtidhArayA ॥ prANapratiSThAM vidhivatkuryAdatra samAhitaH ॥ 58 ॥

एकाग्रमानसो योगी विमृश्यात्तां च मातृकाम् ॥ पुटितां प्रणवेनाथ न्यसेद्बाह्ये च मातृकाम् ॥ ५९ ॥

ekAgramAnaso yogI vimRzyAttAM ca mAtRkAm ॥ puTitAM praNavenAtha nyasedbAhye ca mAtRkAm ॥ 59 ॥

पुनश्च संयतप्राणः कुर्याद्दृष्ट्यादिकं बुधः ॥ शंकरं संस्मरंश्चित्ते संन्यसेच्च विमत्सरः ॥ ६० ॥

punazca saMyataprANaH kuryAddRSTyAdikaM budhaH ॥ zaMkaraM saMsmaraMzcitte saMnyasecca vimatsaraH ॥ 60 ॥

प्रणवस्य ऋषिर्ब्रह्मा देवि गायत्रमीरितम् ॥ छन्दोत्र देवताहं वै परमात्मा सदाशिवः ॥ ६१ ॥

praNavasya RSirbrahmA devi gAyatramIritam ॥ chandotra devatAhaM vai paramAtmA sadAzivaH ॥ 61 ॥

अकारो बीजमाख्यातमुकारः शक्तिरुच्यते ॥ मकारः कीलकं प्रोक्तं मोक्षार्थे विनियुज्यते ॥ ६२॥

akAro bIjamAkhyAtamukAraH zaktirucyate ॥ makAraH kIlakaM proktaM mokSArthe viniyujyate ॥ 62॥

अंगुष्ठद्वयमारभ्य तलांतं परिमार्जयेत् ॥ ओमित्युक्त्वाथ देवेशि करन्यासं समारभेत् ॥ ६३॥

aMguSThadvayamArabhya talAMtaM parimArjayet ॥ omityuktvAtha devezi karanyAsaM samArabhet ॥ 63॥

दक्षहस्तस्थितांगुष्ठं समारभ्य यथाक्रमम् ॥ वामहस्तकनिष्ठांतं विन्यसेत्पूर्ववत्क्रमात् ॥ ६४ ॥

dakSahastasthitAMguSThaM samArabhya yathAkramam ॥ vAmahastakaniSThAMtaM vinyasetpUrvavatkramAt ॥ 64 ॥

अकारमप्युकारं च मकारं बिन्दुसंयुतम् ॥ नमोन्तं प्रोच्य सर्वत्र हृदयादौ न्यसेदथ ॥ ६५ ॥

akAramapyukAraM ca makAraM bindusaMyutam ॥ namontaM procya sarvatra hRdayAdau nyasedatha ॥ 65 ॥

अकारं पूर्वमुद्धृत्य ब्रह्मात्मानमथाचरेत् ॥ ङेंतं नमोंतं हृदये विनियुज्यात्तथा पुनः॥ ६६॥

akAraM pUrvamuddhRtya brahmAtmAnamathAcaret ॥ GeMtaM namoMtaM hRdaye viniyujyAttathA punaH॥ 66॥

उकारं विष्णुसहितं शिरोदेशे प्रविन्यसेत्॥ मकारं रुद्रसहितं शिखायान्तु प्रविन्यसेत् ॥ ६७ ॥

ukAraM viSNusahitaM zirodeze pravinyaset॥ makAraM rudrasahitaM zikhAyAntu pravinyaset ॥ 67 ॥

एवमुक्त्वा मुनिर्मंत्री कवचं नेत्रमस्तके ॥ विन्यसेद्देवदेवेशि सावधानेन चेतसा ॥ ६८ ॥

evamuktvA munirmaMtrI kavacaM netramastake ॥ vinyaseddevadevezi sAvadhAnena cetasA ॥ 68 ॥

अंगवक्त्रकलाभेदात्पंच ब्रह्माणि विन्यसेत् ॥ शिरोवदनहृदगुह्यपादेष्वेतानि विन्यसेत् ॥ ६९॥

aMgavaktrakalAbhedAtpaMca brahmANi vinyaset ॥ zirovadanahRdaguhyapAdeSvetAni vinyaset ॥ 69॥

ईशान्यस्य कलाः पंच पंचस्वेतेषु च क्रमात् ॥ ततश्चतुर्षु वक्त्रेषु पुरुषस्य कला अपि ॥ ७०॥

IzAnyasya kalAH paMca paMcasveteSu ca kramAt ॥ tatazcaturSu vaktreSu puruSasya kalA api ॥ 70॥

चतस्रः प्रणिधातव्याः पूर्वादिक्रमयोगतः ॥ हृत्कंठांसेषु नाभौ च कुक्षौ पृष्ठे च वक्षसि ॥ ७१॥

catasraH praNidhAtavyAH pUrvAdikramayogataH ॥ hRtkaMThAMseSu nAbhau ca kukSau pRSThe ca vakSasi ॥ 71॥

अघोरस्य कलाश्चाष्टौ पूजनीया यथाक्रमम् ॥ पश्चात्त्रयोदशकलाः पायुमेढ्रोरुजानुषु॥ ७२॥

aghorasya kalAzcASTau pUjanIyA yathAkramam ॥ pazcAttrayodazakalAH pAyumeDhrorujAnuSu॥ 72॥

जंघास्फिक्कटिपार्श्वेषु वामदेवस्य भावयेत्॥ सद्यस्यापि कला चाष्टौ नेत्रेषु च यथाक्रमम्॥ ७३॥

jaMghAsphikkaTipArzveSu vAmadevasya bhAvayet॥ sadyasyApi kalA cASTau netreSu ca yathAkramam॥ 73॥

कीर्तितास्ताः कलाश्चैव पादयोरपि हस्तयोः॥ प्राणे शिरसि बाह्वोश्च कल्पयेत्कल्पवित्तमः ॥ ७४॥

kIrtitAstAH kalAzcaiva pAdayorapi hastayoH॥ prANe zirasi bAhvozca kalpayetkalpavittamaH ॥ 74॥

अष्टत्रिंशत्कलान्यासमेवं कृत्वा तु सर्वशः ॥ पश्चात्प्रणवविद्धीमान्प्रणवन्यासमाचरेत्॥ ७५ ॥

aSTatriMzatkalAnyAsamevaM kRtvA tu sarvazaH ॥ pazcAtpraNavaviddhImAnpraNavanyAsamAcaret॥ 75 ॥

बाहुद्वये कूर्परयोस्तथा च मणिबन्धयोः॥ पार्श्वतोदरजंघेषु पादयोः पृष्ठतस्तथा॥ ७६॥

bAhudvaye kUrparayostathA ca maNibandhayoH॥ pArzvatodarajaMgheSu pAdayoH pRSThatastathA॥ 76॥

इत्थं प्रणवविन्यासं कृत्वा न्यासविचक्षणः॥ हंसन्यासं प्रकुर्वीत परमात्मविबोधिनि ॥ ७७ ॥

itthaM praNavavinyAsaM kRtvA nyAsavicakSaNaH॥ haMsanyAsaM prakurvIta paramAtmavibodhini ॥ 77 ॥