काम्यदानानि वक्ष्यामि सर्वकाम प्रदानि ते । नित्यपूजां मासि मासि कृत्वाथो काम्यपूजनं ।।

kāmyadānāni vakṣyāmi sarvakāma pradāni te | nityapūjāṃ māsi māsi kṛtvātho kāmyapūjanaṃ ||

व्रतार्हणं गुरोः पूजा वत्सरान्ते महार्चनं । अश्वं वै मार्गशैर्षे तु कमलं पिष्टसम्भवं ।।

vratārhaṇaṃ guroḥ pūjā vatsarānte mahārcanaṃ | aśvaṃ vai mārgaśairṣe tu kamalaṃ piṣṭasambhavaṃ ||

शिवाय पूज्य यो दद्यात सूर्यलोके चिरं वसेत । गजं पौषे पिष्टमयं त्रिसप्तकुलमुद्धरेत ।।

śivāya pūjya yo dadyāt sūryaloke ciraṃ vaset | gajaṃ pauṣe piṣṭamayaṃ trisaptakulamuddharet ||

माघे चाश्वरथं पैष्ठं दत्त्वा नरकं व्रजेत । फाल्गुने तु वृषं पैष्टं स्वर्गभुक स्यान्महीपतिः ।।

māghe cāśvarathaṃ paiṣṭhaṃ dattvā narakaṃ vrajet | phālgune tu vṛṣaṃ paiṣṭaṃ svargabhuk syānmahīpatiḥ ||

चैत्रे चेक्षुमयीं गावन्दासदासीसमन्वितां । दत्त्वा स्वर्गे चिरं स्थित्वा तदन्ते स्यान्महीपतिः ।।

caitre cekṣumayīṃ gāvandāsadāsīsamanvitāṃ | dattvā svarge ciraṃ sthitvā tadante syānmahīpatiḥ ||

सप्तव्रीहींश च वैशाखे दत्त्वा शिवमयो भवेत । बलिमण्डलकञ्चान्नैः कृत्वाषाढे शिवो भवेत ।।

saptavrīhīṃś ca vaiśākhe dattvā śivamayo bhavet | balimaṇḍalakañcānnaiḥ kṛtvāṣāḍhe śivo bhavet ||

विमानं श्रावणे पौष्पं दत्त्वा स्वर्गी ततो नृपः । शतद्वयं फलानान्तु दत्त्वोद्धृत्य कुलं नृपः ।।

vimānaṃ śrāvaṇe pauṣpaṃ dattvā svargī tato nṛpaḥ | śatadvayaṃ phalānāntu dattvoddhṛtya kulaṃ nṛpaḥ ||

गुग्गुलादि दहेद्भाद्रे स्वर्गी स स्यात्ततो नृपः । क्षीरसर्पिर्भृतं पात्रमाश्विने स्वर्गदम्भवेत ।।

guggulādi dahedbhādre svargī sa syāttato nṛpaḥ | kṣīrasarpirbhṛtaṃ pātramāśvine svargadambhavet ||

कार्त्तिके गुडखण्डाज्यं दत्त्वा स्वर्गी ततो नृपः । मेरुदानं द्वादशकं वक्ष्ये ऽहं भुक्तिमुक्तिदं ।।

kārttike guḍakhaṇḍājyaṃ dattvā svargī tato nṛpaḥ | merudānaṃ dvādaśakaṃ vakṣye 'haṃ bhuktimuktidaṃ ||

मेरुव्रते तु कार्त्तिक्यां रत्नमेरुन्ददेद द्विजे । सर्वेषाञ्चैव मेरूणां प्रमाणं क्रमशः शृणु ।।

meruvrate tu kārttikyāṃ ratnamerundaded dvije | sarveṣāñcaiva merūṇāṃ pramāṇaṃ kramaśaḥ śṛṇu ||

वज्रपद्ममहानीलनीलस्फटिकसञ्ज्ञितः । पुष्पं मरकतं मुक्ता प्रस्थमात्रेण चोत्तमः ।।

vajrapadmamahānīlanīlasphaṭikasañjñitaḥ | puṣpaṃ marakataṃ muktā prasthamātreṇa cottamaḥ ||

मध्यो ऽर्धः स्यात्तदर्धो ऽधो वित्तशाठ्यं विवर्जयेत । कार्णिकायां न्यसेन्मेरुं ब्रह्मविष्ण्वीशदैवतं ।।

madhyo 'rdhaḥ syāttadardho 'dho vittaśāṭhyaṃ vivarjayet | kārṇikāyāṃ nyasenmeruṃ brahmaviṣṇvīśadaivataṃ ||

माल्यवान पूर्वतः पूज्यस्तत्पूर्वे भदरसञ्ज्ञितः । अश्वरक्षस्ततः प्रोक्तो निषधो मेरुदक्षिणे ।।

mālyavān pūrvataḥ pūjyastatpūrve bhadarasañjñitaḥ | aśvarakṣastataḥ prokto niṣadho merudakṣiṇe ||

हेमकूटो ऽथ हिमवान त्रयं सौम्ये तथा त्रयं । नीलः श्वेतश च शृङ्गी च पश्चिमे गन्धमादनः ।।

hemakūṭo 'tha himavān trayaṃ saumye tathā trayaṃ | nīlaḥ śvetaś ca śṛṅgī ca paścime gandhamādanaḥ ||

वैकङ्कः केतुमालः स्यान्मेरुर्द्वादशसंयुतः । सोपवासो ऽर्चयेद्विष्णुं शिवं वा स्नानपूर्वकं ।।

vaikaṅkaḥ ketumālaḥ syānmerurdvādaśasaṃyutaḥ | sopavāso 'rcayedviṣṇuṃ śivaṃ vā snānapūrvakaṃ ||

देवाग्रे चार्च्य मेरुञ्च मन्त्रैर विप्राय वै ददेत । विप्रायामुकगोत्राय मेरुन्द्रव्यमयम्परं ।।

devāgre cārcya meruñca mantrair viprāya vai dadet | viprāyāmukagotrāya merundravyamayamparaṃ ||

भुक्त्यै मुक्त्यै निर्मलत्वे विष्णुदैवं ददामि ते । इन्द्रलोके ब्रह्मलोके शिवलोके हरेः पुरे ।।

bhuktyai muktyai nirmalatve viṣṇudaivaṃ dadāmi te | indraloke brahmaloke śivaloke hareḥ pure ||

कुलमुद्धृत्य क्रीडेत विमाने देवपूजितः । अन्येष्वपि च कालेषु सङ्क्रान्त्यादौ प्रदापयेत ।।

kulamuddhṛtya krīḍeta vimāne devapūjitaḥ | anyeṣvapi ca kāleṣu saṅkrāntyādau pradāpayet ||

पलानान्तु सहस्रेण हेममेरुम्प्रकल्पयेत । शृङ्गत्रयसमायुक्तं ब्रह्मविष्णुहरान्वितं ।।

palānāntu sahasreṇa hemamerumprakalpayet | śṛṅgatrayasamāyuktaṃ brahmaviṣṇuharānvitaṃ ||

एकैकं पर्वतन्तस्य शतैकैकेन कारयेत । मेरुणा सह शैलास्तु ख्यातास्तत्र त्रयोदश ।।

ekaikaṃ parvatantasya śataikaikena kārayet | meruṇā saha śailāstu khyātāstatra trayodaśa ||

अयने ग्रहणादौ च विष्ण्वग्रे हरिमर्च्य च । स्वर्णमेरुं द्विजायार्प्य विष्णुलोके चिरं वसेत ।।

ayane grahaṇādau ca viṣṇvagre harimarcya ca | svarṇameruṃ dvijāyārpya viṣṇuloke ciraṃ vaset ||

परमाणवो यावन्त इह राजा भवेच्चिरं । रौप्यमेरुं द्वादशाद्रियुतं सङ्कल्पतो ददेत ।।

paramāṇavo yāvanta iha rājā bhavecciraṃ | raupyameruṃ dvādaśādriyutaṃ saṅkalpato dadet ||

प्रागुक्तं च फलं तस्य विष्णुं विप्रंप्रपूज्य च । भूमिमेरुञ्च विषयं मण्डलं ग्राममेव च ।।

prāguktaṃ ca phalaṃ tasya viṣṇuṃ vipraṃprapūjya ca | bhūmimeruñca viṣayaṃ maṇḍalaṃ grāmameva ca ||

परिकल्प्याष्टमांशेन शेषांशाः पूर्ववत फलं । द्वादशाद्रिसमायुक्तं हस्तिमेरुस्वरूपिणं ।।

parikalpyāṣṭamāṃśena śeṣāṃśāḥ pūrvavat phalaṃ | dvādaśādrisamāyuktaṃ hastimerusvarūpiṇaṃ ||

ददेत्त्रिपुरुषैर युक्तं दत्त्वानन्तं फलं लभेत । त्रिपञ्चाश्वैर अश्वमेरुं हययद्वादशसंयुतं ।।

dadettripuruṣair yuktaṃ dattvānantaṃ phalaṃ labhet | tripañcāśvair aśvameruṃ hayayadvādaśasaṃyutaṃ ||

विष्ण्वादीन पूज्य तं दत्त्वा भुक्तभोगो नृपो भवेत । अश्वसङ्ख्याप्रमाणेन गोमेरुं पूर्ववद्ददेत ।।

viṣṇvādīn pūjya taṃ dattvā bhuktabhogo nṛpo bhavet | aśvasaṅkhyāpramāṇena gomeruṃ pūrvavaddadet ||

पट्टवस्त्रैर भारमात्रैर वस्त्रमेरुश च मध्यतः । शैलैर द्वादशवस्त्रैश च दत्त्वा तञ्चाक्षयं फलं ।।

paṭṭavastrair bhāramātrair vastrameruś ca madhyataḥ | śailair dvādaśavastraiś ca dattvā tañcākṣayaṃ phalaṃ ||

घृतपञ्चसहस्रैश च पलानामाज्यपर्वतः । शतैः पञ्चभिरेकैकः पार्वते ऽस्मिन हरिं यजेत ।।

ghṛtapañcasahasraiś ca palānāmājyaparvataḥ | śataiḥ pañcabhirekaikaḥ pārvate 'smin hariṃ yajet ||

विष्ण्वग्रे ब्राह्मणायार्प्य सर्वं प्राप्य हरिं व्रजेत । एवं च खण्डमेरुञ्च कृत्वा दत्त्वाप्नुयात फलं ।।

viṣṇvagre brāhmaṇāyārpya sarvaṃ prāpya hariṃ vrajet | evaṃ ca khaṇḍameruñca kṛtvā dattvāpnuyāt phalaṃ ||

धान्यमेरुः पञ्चखारो ऽपर एकैकखारकाः । स्वर्णत्रिशृङ्गकाः सर्वे ब्रह्मविष्णुमहेश्वरान ।।

dhānyameruḥ pañcakhāro 'para ekaikakhārakāḥ | svarṇatriśṛṅgakāḥ sarve brahmaviṣṇumaheśvarān ||

सर्वेषु पूज्य विष्णुं वा विशेषादक्षयं फलं । एवं दशांशमानेन तिलमेरुं प्रकल्पयेत ।।

sarveṣu pūjya viṣṇuṃ vā viśeṣādakṣayaṃ phalaṃ | evaṃ daśāṃśamānena tilameruṃ prakalpayet ||

शृङ्गाणि पूर्ववत्तस्य तथैवान्यनगेषु च । तिलमेरुं प्रदायाथ बन्धुभिर्विष्णुलोकभाक ।।

śṛṅgāṇi pūrvavattasya tathaivānyanageṣu ca | tilameruṃ pradāyātha bandhubhirviṣṇulokabhāk ||

नमो विष्णुस्वरूपाय धराधराय वै नमः । ब्रह्मविष्ण्वीशशृङ्गाय धरानाभिस्थिताय च ।।

namo viṣṇusvarūpāya dharādharāya vai namaḥ | brahmaviṣṇvīśaśṛṅgāya dharānābhisthitāya ca ||

नगद्वादशनाथाय सर्वपापापहारिणे । विष्णुभक्ताय शान्ताय त्राणं मे कुरु सर्वथा ।।

nagadvādaśanāthāya sarvapāpāpahāriṇe | viṣṇubhaktāya śāntāya trāṇaṃ me kuru sarvathā ||

निष्पापः पितृभिः सार्धं विष्णुं गच्छामि ओं नमः । त्वं हरिस्तु हरेरग्रे अहं विष्णुश च विष्णवे ।।

niṣpāpaḥ pitṛbhiḥ sārdhaṃ viṣṇuṃ gacchāmi oṃ namaḥ | tvaṃ haristu hareragre ahaṃ viṣṇuś ca viṣṇave ||

निवेदयामि भक्त्या तु भुक्तिमुक्त्यर्थहेतवे ।।

nivedayāmi bhaktyā tu bhuktimuktyarthahetave ||