नर्मदादिकमाहात्म्यं वक्ष्येहं नर्मदां परां । सद्यः पुनाति गाङ्गेयं दर्शनाद्वारि नार्मदं ।।

narmadādikamāhātmyaṃ vakṣyehaṃ narmadāṃ parāṃ | sadyaḥ punāti gāṅgeyaṃ darśanādvāri nārmadaṃ ||

विस्तराद्योजनशतं योजनद्वयमायता । षष्टिस्तीर्थसहस्राणि षष्टिकोट्यस तथापराः ।।

vistarādyojanaśataṃ yojanadvayamāyatā | ṣaṣṭistīrthasahasrāṇi ṣaṣṭikoṭyas tathāparāḥ ||

पर्वतस्य समन्तात्तु तिष्ठन्त्यमरकण्टके । कावेरीसङ्गमं पुण्यं श्रीपर्वतमतः शृणु ।।

parvatasya samantāttu tiṣṭhantyamarakaṇṭake | kāverīsaṅgamaṃ puṇyaṃ śrīparvatamataḥ śṛṇu ||

गौरी श्रीरूपिणी तेपे तपस्तामब्रवीद्धरिः । अवाप्स्यसि त्वमध्यात्म्यं नाम्ना श्रीपर्वतस्तव ।।

gaurī śrīrūpiṇī tepe tapastāmabravīddhariḥ | avāpsyasi tvamadhyātmyaṃ nāmnā śrīparvatastava ||

समन्ताद्योजनशतं महापुण्यं भविष्यति । अत्र दानन्तपो जप्यं श्राद्धं सर्वमथाक्षयं ।।

samantādyojanaśataṃ mahāpuṇyaṃ bhaviṣyati | atra dānantapo japyaṃ śrāddhaṃ sarvamathākṣayaṃ ||

मरणं शिवलोकाय सर्वदं तीर्थमुत्तमं । हरो ऽत्र क्रीडते देव्या हिरण्यकशिपुस तथा ।।

maraṇaṃ śivalokāya sarvadaṃ tīrthamuttamaṃ | haro 'tra krīḍate devyā hiraṇyakaśipus tathā ||

तपस्तप्त्वा बली चाभून्मुनयः सिद्धिमाप्नुवन ।।

tapastaptvā balī cābhūnmunayaḥ siddhimāpnuvan ||