पवित्रारोहणं वक्ष्ये वर्षपूजाकलं हरेः । आषाढादौ कार्तिकान्ते प्रतिपद्वनदा तिथिः ।।

pavitrārohaṇaṃ vakṣye varṣapūjākalaṃ hareḥ | āṣāḍhādau kārtikānte pratipadvanadā tithiḥ ||

श्रिया गौर्या गणेशस्य सरस्वत्या गुहस्य च । मार्तण्डमातृदुर्गाणां नागर्षिहरिमन्मथैः ।।

śriyā gauryā gaṇeśasya sarasvatyā guhasya ca | mārtaṇḍamātṛdurgāṇāṃ nāgarṣiharimanmathaiḥ ||

शिवस्य ब्रह्मणस्तद्वद्द्वितीयादितिथेः क्रमात । यस्य देवस्य यो भक्तः पवित्रा तस्य सा तिथिः ।।

śivasya brahmaṇastadvaddvitīyādititheḥ kramāt | yasya devasya yo bhaktaḥ pavitrā tasya sā tithiḥ ||

आरोहणे तुल्यविधिः पृथक मन्त्रादिकं यदि । सौवर्णे राजतं ताम्रं नेत्रकार्पासिकादिकं ।।

ārohaṇe tulyavidhiḥ pṛthak mantrādikaṃ yadi | sauvarṇe rājataṃ tāmraṃ netrakārpāsikādikaṃ ||

ब्राह्मण्या कर्तितं सूत्रं तदलाभे तु संस्कृतं । त्रिगुणं त्रिगुणीकृत्य तेन कुर्यात पवित्रकं ।।

brāhmaṇyā kartitaṃ sūtraṃ tadalābhe tu saṃskṛtaṃ | triguṇaṃ triguṇīkṛtya tena kuryāt pavitrakaṃ ||

अष्तोत्तरशतादूर्ध्वं तदर्धं चोत्तमादिकं । क्रियालोपाविघातार्थं यत्त्वयाभिहितं प्रभो ।।

aṣtottaraśatādūrdhvaṃ tadardhaṃ cottamādikaṃ | kriyālopāvighātārthaṃ yattvayābhihitaṃ prabho ||

मया तत क्रियते देव यथा यत्र पावित्रकं । अविघ्नं तु भवेदत्र कुरु नाथ जयाव्यय ।।

mayā tat kriyate deva yathā yatra pāvitrakaṃ | avighnaṃ tu bhavedatra kuru nātha jayāvyaya ||

प्रार्थ्य तन्मण्डलायादौ गायत्र्या बन्धयेन्नरः । ओं नारायणाय विद्महे वासुदेवाय धीमहि ।।

prārthya tanmaṇḍalāyādau gāyatryā bandhayennaraḥ | oṃ nārāyaṇāya vidmahe vāsudevāya dhīmahi ||

तन्नो विष्णुः प्रचोदयात देवदेवानुरूपतः । जानूरुनाभिनामान्तं प्रतिमासु पवित्रकं ।।

tanno viṣṇuḥ pracodayāt devadevānurūpataḥ | jānūrunābhināmāntaṃ pratimāsu pavitrakaṃ ||

पादान्ता वनमाला स्यादष्टोत्त्रसहस्रतः । माला तु कल्पसाध्यं वा द्विगुणं षोडशाङ्गुलात ।।

pādāntā vanamālā syādaṣṭottrasahasrataḥ | mālā tu kalpasādhyaṃ vā dviguṇaṃ ṣoḍaśāṅgulāt ||

कर्णिका केशरं पत्रं मन्त्राद्यं मण्डलान्तकं । मण्डलाङ्गुलमात्रैकचक्राब्जाद्यौ पवित्रकं ।।

karṇikā keśaraṃ patraṃ mantrādyaṃ maṇḍalāntakaṃ | maṇḍalāṅgulamātraikacakrābjādyau pavitrakaṃ ||

स्थण्डिले ऽङ्गुलमानेन आत्मनः सप्तविंशतिः । आचार्याणां च सूत्राणि पितृमात्रादिपुस्तके ।।

sthaṇḍile 'ṅgulamānena ātmanaḥ saptaviṃśatiḥ | ācāryāṇāṃ ca sūtrāṇi pitṛmātrādipustake ||

नाभ्यन्तं द्वादशग्रन्थिं तथा गन्धपवित्रके । द्व्यङ्गुलात कल्पनादौ द्विर्माला चाष्टोत्तरं शतं ।।

nābhyantaṃ dvādaśagranthiṃ tathā gandhapavitrake | dvyaṅgulāt kalpanādau dvirmālā cāṣṭottaraṃ śataṃ ||

अथवार्कचतुर्विंशषड्त्रिंशन्मालिका द्विजः । अनामामध्यमाङ्गुष्ठैर मन्दाद्यैः मालिकार्थिभिः ।।

athavārkacaturviṃśaṣaḍtriṃśanmālikā dvijaḥ | anāmāmadhyamāṅguṣṭhair mandādyaiḥ mālikārthibhiḥ ||

कनिष्टादौ द्वादश वा ग्रन्थयः स्युः पवित्रके । रवेः कुम्भहुताशादेः सम्भवे विष्णुवन्मतम ।।

kaniṣṭādau dvādaśa vā granthayaḥ syuḥ pavitrake | raveḥ kumbhahutāśādeḥ sambhave viṣṇuvanmatam ||

पीठस्य पीठमानं स्यान्मेखलान्ते च कुण्डकं । यथाशक्ति सूत्रग्रन्थिपरिचारेथ वैष्णवे ।।

pīṭhasya pīṭhamānaṃ syānmekhalānte ca kuṇḍakaṃ | yathāśakti sūtragranthiparicāretha vaiṣṇave ||

सूत्राणि वा सप्तदश सूत्रेण त्रिविभक्तके । रोचनागुरुकर्पूरहरिद्राकुङ्कुमादिभिः ।।

sūtrāṇi vā saptadaśa sūtreṇa trivibhaktake | rocanāgurukarpūraharidrākuṅkumādibhiḥ ||

रञ्जयेच्चन्दनाद्यैर वा स्नानसन्ध्यादिकृन्नरः । एकादश्यां यागगृहे भगवन्तं हरिं जयेत ।।

rañjayeccandanādyair vā snānasandhyādikṛnnaraḥ | ekādaśyāṃ yāgagṛhe bhagavantaṃ hariṃ jayet ||

समस्तपरिवाराय बलिं पीठे समर्चयेत । क्ष्यौं क्षेत्रपालाय द्वारान्ते द्वारोपरि तथा श्रियं ।।

samastaparivārāya baliṃ pīṭhe samarcayet | kṣyauṃ kṣetrapālāya dvārānte dvāropari tathā śriyaṃ ||

धात्रे दक्षे विधात्रे च गङ्गाञ्च यमुनां तथा । शङ्खपद्मनिधी पूज्य मध्ये वास्त्वपसारणं । सारङ्गायेति भूतानां भूतशुद्धिं स्थितश चरेत ।।

dhātre dakṣe vidhātre ca gaṅgāñca yamunāṃ tathā | śaṅkhapadmanidhī pūjya madhye vāstvapasāraṇaṃ | sāraṅgāyeti bhūtānāṃ bhūtaśuddhiṃ sthitaś caret ||

पञ्चोद्घातैर गन्धतन्मात्ररूपं भूमिमण्डलं । चतुरस्रञ्च पीतञ्च कठिनं वज्रलाञ्छितम ।।

pañcodghātair gandhatanmātrarūpaṃ bhūmimaṇḍalaṃ | caturasrañca pītañca kaṭhinaṃ vajralāñchitam ||

इन्द्राधिदैवतं पादयुग्ममध्यगतं स्मरेत । शुद्धञ्च रसतन्मात्रं प्रविलिप्याथ संहरेत । रसमात्ररूपमात्रे क्रमेणानेन पूजकः ।।

indrādhidaivataṃ pādayugmamadhyagataṃ smaret | śuddhañca rasatanmātraṃ pravilipyātha saṃharet | rasamātrarūpamātre krameṇānena pūjakaḥ ||

जानुनाभिमध्यगतं श्वेतं वै पद्मलाञ्छितं । शुक्लवर्णं चार्धचन्द्रं ध्यायेद्वरुणदैवतं ।।

jānunābhimadhyagataṃ śvetaṃ vai padmalāñchitaṃ | śuklavarṇaṃ cārdhacandraṃ dhyāyedvaruṇadaivataṃ ||

चतुर्भिश च तदुद्घातैः शुद्धं तद्रसमात्रकं । संहरेद्रूपतन्मात्रै रूपमात्रे च संहरेत ।।

caturbhiś ca tadudghātaiḥ śuddhaṃ tadrasamātrakaṃ | saṃharedrūpatanmātrai rūpamātre ca saṃharet ||

इति त्रिभिस्तदुद्घातैस्त्रिकोणं वह्निमण्डलम । नाभिकण्ठमध्यगतं रक्तं स्वस्तिकलाञ्छितं ।।

iti tribhistadudghātaistrikoṇaṃ vahnimaṇḍalam | nābhikaṇṭhamadhyagataṃ raktaṃ svastikalāñchitaṃ ||

ध्यात्वानलाधिदैवन्तच्छुद्धं स्पर्शे लयं नयत । कण्ठनासामध्यगतं वृत्तं वै वायुमण्डलम ।।

dhyātvānalādhidaivantacchuddhaṃ sparśe layaṃ nayat | kaṇṭhanāsāmadhyagataṃ vṛttaṃ vai vāyumaṇḍalam ||

द्विरुद्घातैर धूम्रवर्णं ध्यायेच्छुद्धेन्दुलाञ्छितम । स्पर्शमात्रं शब्दमात्रैः संहरेद्ध्यानयोगतः ।।

dvirudghātair dhūmravarṇaṃ dhyāyecchuddhendulāñchitam | sparśamātraṃ śabdamātraiḥ saṃhareddhyānayogataḥ ||

एकोद्घातेन चाकाशं शुद्धस्फटिकसन्निभम । नासापुटशिखान्तस्थमाकाशमुपसंहरेत ।।

ekodghātena cākāśaṃ śuddhasphaṭikasannibham | nāsāpuṭaśikhāntasthamākāśamupasaṃharet ||

शोषणाद्यैर देहशुद्धिं कुर्यादेवम क्रमात्ततः । शुष्कं कलेवरं ध्यायेत पादाद्यञ्च शिखान्तकम ।।

śoṣaṇādyair dehaśuddhiṃ kuryādevam kramāttataḥ | śuṣkaṃ kalevaraṃ dhyāyet pādādyañca śikhāntakam ||

यं वीजेन वं वीजेन ज्वालामालासमायुतम । देहं रमित्यनेनैव ब्रह्मरन्ध्राद्विनिर्गतम ।।

yaṃ vījena vaṃ vījena jvālāmālāsamāyutam | dehaṃ ramityanenaiva brahmarandhrādvinirgatam ||

विन्दुन्ध्यात्वा चामृतस्य तेन भस्मकलेवरम । सम्प्लावयेल्लमित्यस्मात देहं सम्पाद्य दिव्यकम ।।

vindundhyātvā cāmṛtasya tena bhasmakalevaram | samplāvayellamityasmāt dehaṃ sampādya divyakam ||

न्यासं कृत्वा करे देहे मानसं यागमाचरेत । विष्णुं साङ्गं हृदि पद्मे मानसैः कुसुमादिभिः ।।

nyāsaṃ kṛtvā kare dehe mānasaṃ yāgamācaret | viṣṇuṃ sāṅgaṃ hṛdi padme mānasaiḥ kusumādibhiḥ ||

मूलमन्त्रेण देवेशम्प्रार्चयेद्भुक्तिमुक्तिदम । स्वागतं देवदेवेश सन्निधौ भव केशव ।।

mūlamantreṇa deveśamprārcayedbhuktimuktidam | svāgataṃ devadeveśa sannidhau bhava keśava ||

गृहाण मानसीं पूजां यथार्थं परिभाविताम । आधारशक्तिः कूर्माथ पूज्योनन्तो मही ततः ।।

gṛhāṇa mānasīṃ pūjāṃ yathārthaṃ paribhāvitām | ādhāraśaktiḥ kūrmātha pūjyonanto mahī tataḥ ||

मध्येग्न्यादौ च धर्माद्या अधर्मादीन्द्रमुख्यगम । सत्त्वादि मध्ये पद्मञ्च मायाविद्याख्यतत्त्वके ।।

madhyegnyādau ca dharmādyā adharmādīndramukhyagam | sattvādi madhye padmañca māyāvidyākhyatattvake ||

कालतत्त्वञ्च सूर्यादिमण्डलं पक्षिराजकः । मध्ये ततश च वायव्यादीशान्ता गुरुपङ्क्तिकाः ।।

kālatattvañca sūryādimaṇḍalaṃ pakṣirājakaḥ | madhye tataś ca vāyavyādīśāntā gurupaṅktikāḥ ||

गणः सरस्वती पूज्या नारदो नलकूवरः । गुरुर्गुरुपादुका च परो गुरुश च पादुका ।।

gaṇaḥ sarasvatī pūjyā nārado nalakūvaraḥ | gururgurupādukā ca paro guruś ca pādukā ||

पूर्वसिद्धाः परसिद्धाः केशरेषु च शक्तयः । लक्ष्मीः सरस्वती प्रीतिः कीर्तिः शान्तिश च कान्तिका ।।

pūrvasiddhāḥ parasiddhāḥ keśareṣu ca śaktayaḥ | lakṣmīḥ sarasvatī prītiḥ kīrtiḥ śāntiś ca kāntikā ||

पुष्टिस्तुष्टिर्महेन्द्राद्या मध्ये वाचाहितो हरिः । धृतिः श्रीरतिकान्त्याद्या मूलेन स्थापितो ऽच्युतः ।।

puṣṭistuṣṭirmahendrādyā madhye vācāhito hariḥ | dhṛtiḥ śrīratikāntyādyā mūlena sthāpito 'cyutaḥ ||

ओं अभिमुखो भवेति प्रार्थ्य सन्निहितो भव । विन्यस्यार्घ्यादिकं दत्वा गन्धाद्यैर मूलतो यजेत ।।

oṃ abhimukho bhaveti prārthya sannihito bhava | vinyasyārghyādikaṃ datvā gandhādyair mūlato yajet ||

ओं भीषय भीषय हृत शिरस्त्रासय वै पुनः । मर्दय मर्दय शिखा अग्न्यादौ शस्त्रतोस्त्रकं ।।

oṃ bhīṣaya bhīṣaya hṛt śirastrāsaya vai punaḥ | mardaya mardaya śikhā agnyādau śastratostrakaṃ ||

रक्ष रक्ष प्रध्वंसय प्रध्वंसय कवचाय नमस्ततः । ओं ह्रूं फट अस्त्राय नमो मूलवीजेन चाङ्गकं ।।

rakṣa rakṣa pradhvaṃsaya pradhvaṃsaya kavacāya namastataḥ | oṃ hrūṃ phaṭ astrāya namo mūlavījena cāṅgakaṃ ||

पूर्वदक्षाप्यसौम्येषु मूर्त्यावरणमर्चयेत । वासुदेवः सङ्कर्षणः प्रद्युम्नश्चानिरुद्धकः ।।

pūrvadakṣāpyasaumyeṣu mūrtyāvaraṇamarcayet | vāsudevaḥ saṅkarṣaṇaḥ pradyumnaścāniruddhakaḥ ||

अग्न्यादौ श्रीधृतिरतिकान्तयो मूर्तयो हरेः । शङ्खचक्रगदापद्ममग्न्यादौ पूर्वकादिकं ।।

agnyādau śrīdhṛtiratikāntayo mūrtayo hareḥ | śaṅkhacakragadāpadmamagnyādau pūrvakādikaṃ ||

शार्ङ्गञ्च मुषलं खड्गं वनमालाञ्च तद्वहिः । इन्द्राद्याश च तयानन्तो नैरृत्यां वरुणस्ततः ।।

śārṅgañca muṣalaṃ khaḍgaṃ vanamālāñca tadvahiḥ | indrādyāś ca tayānanto nairṛtyāṃ varuṇastataḥ ||

ब्रह्मेन्द्रेशानयोर्मध्ये अस्त्रावरणकं वहिः । ऐरावतस्ततश्छागो महिषो वानरो झषः ।।

brahmendreśānayormadhye astrāvaraṇakaṃ vahiḥ | airāvatastataśchāgo mahiṣo vānaro jhaṣaḥ ||

मृगः शशो ऽथ वृषभः कूर्मो हंसस्ततो वहिः । पृश्निगर्भः कुमुदाद्या द्वारपाला द्वयं द्वयं ।।

mṛgaḥ śaśo 'tha vṛṣabhaḥ kūrmo haṃsastato vahiḥ | pṛśnigarbhaḥ kumudādyā dvārapālā dvayaṃ dvayaṃ ||

पूर्वाद्युत्तरद्वारान्तं हरिं नत्वा बलिं वहिः । विष्णुपार्षदेभ्यो नमो बलिपीठे बलिं ददेत ।।

pūrvādyuttaradvārāntaṃ hariṃ natvā baliṃ vahiḥ | viṣṇupārṣadebhyo namo balipīṭhe baliṃ dadet ||

विश्वाय विश्वक्सेनात्मने ईशानके यजेत । देवस्य दक्षिणे हस्ते रक्षासूत्रञ्च बन्धयेत ।।

viśvāya viśvaksenātmane īśānake yajet | devasya dakṣiṇe haste rakṣāsūtrañca bandhayet ||

संवत्सरकृताचार्याः सम्पूर्णफलदायिने । पवित्रारोहणायेदं कौतुकं धारय ओं नमः ।।

saṃvatsarakṛtācāryāḥ sampūrṇaphaladāyine | pavitrārohaṇāyedaṃ kautukaṃ dhāraya oṃ namaḥ ||

उपवासादिनियमं कुर्याद्वै देवसन्निधौ । उपवासादिनियतो देवं सन्तोषयाम्यहम ।।

upavāsādiniyamaṃ kuryādvai devasannidhau | upavāsādiniyato devaṃ santoṣayāmyaham ||

कामक्रोधादयः सर्वे मा मे तिष्ठन्तु सर्वथा । अद्यप्रभृति देवेश यावद्वैशेषिकं दिनम ।।

kāmakrodhādayaḥ sarve mā me tiṣṭhantu sarvathā | adyaprabhṛti deveśa yāvadvaiśeṣikaṃ dinam ||

यजमानो ह्य अशक्तश्चेत कुर्यान्नक्तादिकं व्रती । हुत्वा विसर्जयेत स्तुत्वा श्रीकरन्नित्यपूजनम । ओं ह्रीं श्रीं श्रीधराय त्रैलोक्यमोहनाय नमः ।।

yajamāno hy aśaktaścet kuryānnaktādikaṃ vratī | hutvā visarjayet stutvā śrīkarannityapūjanam | oṃ hrīṃ śrīṃ śrīdharāya trailokyamohanāya namaḥ ||